വായനയെ സ്നേഹിക്കാൻ പ്രേരിപ്പിച്ച ഉമ്മാച്ചു

ഉറൂബ് എന്ന തൂലികാനാമത്തിൽ പ്രശസ്തനായ പി.സി കുട്ടികൃഷ്ണൻ എന്ന പ്രമുഖ സാഹിത്യകാരന്റെ ' ഉമ്മാച്ചു; എന്ന നോവലാണ് ഞാൻ ആദ്യമായി വായിച്ച പുസ്തകം. എന്റെ പതിമൂന്നാം വയസ്സിലാണ് ഞാൻ ഈ കൃതി വായിച്ചത്. അതിനുമുമ്പും പുസ്തകങ്ങൾ വായിച്ചിട്ടുണ്ടെങ്കിലും ഉറൂബിന്റെ ഉമ്മാച്ചു പോലെ മറ്റൊരു പുസ്തകവും ഞാൻ മനസ്സിരുത്തി വായിച്ചിട്ടില്ല. വളരെ ഹൃദയഹാരിയായ ഒരു നോവലാണ് ഉമ്മാച്ചു. കേരളീയ ഗ്രാമീണപശ്ചാത്തലത്തിൽ നടക്കുന്ന ഇതിലെ കഥയിൽ മനുഷ്യബന്ധങ്ങളുടെ വിവിധ മുഖങ്ങളുണ്ട്. ബീരാനും ഉമ്മാച്ചുവും മായനുമാണ് ഇതിലെ പ്രധാന കഥാപാത്രങ്ങൾ. അവരുടെ ജീവിതത്തിലെ ഉയർച്ചതാഴ്ച്ചകളിലൂടെ വളരുന്ന കഥ അവരുടെ അടുത്ത തലമുറ വരെ ചെന്നാണ് അവസാനിക്കുന്നത്.

ഉമ്മാച്ചുവിൽ ഉറൂബ് ഒരുപാട് ഉപമകൾ ഉപയോഗിച്ചിട്ടുണ്ട്. ഏറ്റവും എടുത്തു പറയേണ്ടത് കഥയിൽ ഉപയോഗിച്ചിരിക്കുന്ന ഭാഷയെക്കുറിച്ചാണ്. മലബാർ ഭാഗത്തെ സംസാര രീതിയാണ് കഥാപാത്രങ്ങൾ ഉപയോഗിക്കുന്നത്. അത് കഥയ്ക്ക് വളരെയധികം ഭംഗി നൽകുന്നു. ഉറൂബിന്റെ ഏറ്റവും മികച്ച രചനകളിലൊന്നായ ഉമ്മാച്ചു മലയാളത്തിലെ ഏറ്റവും നല്ല നോവലുകളിൽ ഒന്നു കൂടിയാണ്.

Written by:
നിവ്യ രാജേഷ്
+2
ഗവ. മോഡൽ എച്ച്.എസ്.എസ്
കോട്ടയം