GK Uncle : Issue #5

ഫൈവ് സ്റ്റാർ നഗരങ്ങൾ

ഇന്ത്യയിലെ ആറ് നഗരങ്ങളെ ഈയിടെ കേന്ദ്ര ഗവൺമെന്റ് ഫൈവ് സ്റ്റാർ നഗരങ്ങളായി പ്രഖ്യാപിച്ചു. അതെന്താ ഈ ഫൈവ് സ്റ്റാർ? വമ്പൻ നഗരങ്ങളായതുകൊണ്ടാണോ? ഹേയ്, അതൊന്നുമല്ല സംഭവം. മാലിന്യനിർമാർജനത്തിന്റെ കാര്യത്തിലാണ് ഈ നഗരങ്ങൾ ഫൈവ് സ്റ്റാർ നേടിയത്. അംബികാപുർ (ഛത്തിസ്ഗഡ്), രാജ്കോട്ട് (ഗുജറാത്ത്), സൂററ്റ് (ഗുജറാത്ത്), മൈസൂർ കർണാടക), ഇൻഡോർ (മധ്യപ്രദേശ്), നവി മുംബൈ (മഹാരാഷ്ട്ര) എന്നിവയാണ് ഇന്ത്യയിലെ മാലിന്യമുക്ത ഫൈവ് സ്റ്റാർ നഗരങ്ങൾ (5-Star Garbage-free cities). ഈ നഗരങ്ങളെ കൂടാതെ 65 നഗരങ്ങൾക്ക് 3-സ്റ്റാർ റേറ്റിങ്ങ് നൽകി. ഡൽഹി ഇക്കൂട്ടത്തിലാണ്. 70 നഗരങ്ങൾക്ക് വൺ സ്റ്റാർ റേറ്റിങ്ങും ലഭിച്ചു. നഗരങ്ങളിലെ മാലിന്യനിർമാർജന പ്രവർത്തനങ്ങൾ വിലയിരുത്താനും പ്രോത്സാഹനം നൽകാനും 2018 - ലാണ് ഈ സ്റ്റാർ റേറ്റിങ് സംവിധാനം ആരംഭിച്ചത്.

ഭൗമ സൂചിക പദവി

തെലങ്കനയിലെ തെലിയ റുമാൽ കൈത്തറി ഉൽപന്നങ്ങൾക്കും ജാർഖണ്ഡിലെ സൊഹ്റൈ ഖോവർ ചിത്രകലയ്ക്കും ഭൗമ സൂചിക പദവി ലഭിച്ചു.
ഒരു പ്രദേശത്തെ തനതായ കാർഷികവിളയ്ക്കോ ഭക്ഷ്യവിഭവത്തിനോ കരകൗശലവസ്തുവിനോ നൽകുന്ന പ്രത്യേക അംഗീകാരമാണ് ഭൗമ സൂചിക പദവി (Geographical Indication Tag). ഇതിന് ഭൂപ്രദേശ സൂചകം എന്നും പറയും. നമ്മുടെ ആറന്മുളക്കണ്ണാടിയൊക്കെ ഇത്തരത്തിൽ ജിഐ ടാഗ് ലഭിച്ച ഉൽപന്നങ്ങളാണ്. മികച്ച ഗുണനിലവാരവും പാരമ്പര്യത്തനിമയുമുള്ള ഉൽപന്നങ്ങൾക്കാണ് ഒരു പ്രദേശത്തിന്റെ പേരിൽ ഈ അംഗീകാരം ലഭിക്കുന്നത്. ചെന്നൈയിലെ ജിയോഗ്രഫിക്കൽ ഇൻഡിക്കേഷൻസ് രജിസ്ട്രിയാണ് ഇന്ത്യയിൽ ജി ഐ ടാഗ് നൽകുന്ന സ്ഥാപനം. ഡാർജീലിങ് ചായയാണ് ആദ്യമായി ജി ഐ ടാഗ് നേടിയ ഇന്ത്യൻ ഉൽപന്നം.

ആർക്ട്ടിക്കിനു വേണ്ടി ഉപഗ്രഹം

ആർക്ടിക് പ്രദേശത്തിന്റെ പരിസ്ഥിതിയെക്കുറിച്ചും കാലാവസ്ഥയെക്കുറിച്ചും പഠിക്കാനായി ഒരു ഉപഗ്രഹം വിക്ഷേപിക്കാനുള്ള തയാറെടുപ്പിലാണ് റഷ്യ. ആർക്ടിക - എം (Arktika-M) എന്നാണ് ഈ കൃത്രിമോപഗ്രഹത്തിന്റെ പേര്. 2020 ന്റെ അവസാനത്തോടെ ഈ ഉപഗ്രഹം വിക്ഷേപിക്കാനാണ് റഷ്യയുടെ പദ്ധതി.

ആൻഡമനിലെ പന ഇനി കേരളത്തിൽ

ആൻഡമൻ ദ്വീപുകളിൽ കാണപ്പെടുന്ന അപൂർവ ഇനം പനയാണ് Pinanga andamanensis. ഒരു സമയത്ത് അന്യംനിന്നു പോയി എന്നു പോലും എഴുതിത്തള്ളിയ ഈ പനയ്ക്ക് നമ്മുടെ കമുകിനോടാണ് അടുത്ത ബന്ധം. കടുത്ത വംശനാശഭീഷണി നേരിടുന്ന ഈ ചെറുപന ഇനി മുതൽ കേരളത്തിന്റെ സംരക്ഷണത്തിൽ സുഖമായി വളരും. തിരുവനന്തപുരത്തെ ജവാഹർലാൽ നെഹ്റു ട്രോപ്പിക്കൽ ബൊട്ടാണിക് ഗാർഡൻ ആൻഡ് റിസർച്ച് ഇൻസ്റ്റിറ്റ്യൂട്ടിലാണ് ഇതുള്ളത്. നിത്യഹരിത വനങ്ങളിൽ കാണുന്ന ഈയിനം പന ഇന്ന് വളരെ കുറച്ചെണ്ണമേ ആൻഡമനിലെ കാടുകളിലുള്ളൂ.

ഹൃദയമിടിപ്പളക്കും, ആളെയും!‌

ഒരാളെ കംപ്യൂട്ടര്‍ എങ്ങനെയാണ് തിരിച്ചറിയുക. വിരലടയാളവും മുഖവും കണ്ണിലെ കൃഷ്ണമണിയുടെ പ്രത്യേകതകളുമൊക്കെ വിശകലനം ചെയ്തിട്ടാണ് കംപ്യൂട്ടര്‍ ഒരാളെ തിരിച്ചറിയുക. പക്ഷേ, അമേരിക്കന്‍ സേനയ്ക്ക് ഇനി അതൊന്നും ആവശ്യമില്ല. അവര്‍ നിര്‍മ്മിച്ച പുതിയ സംവിധാനം ഇതൊന്നുമില്ലാതെ 200 മീറ്റര്‍ അകലെ വച്ചു തന്നെ നിങ്ങളെ തിരിച്ചറിയും. ഹൃദയമിടിപ്പിന്‍റെ പ്രത്യേകത വിലയിരുത്തിക്കൊണ്ട്. ജെറ്റ്സണ്‍ എന്ന് പേരിട്ടിരിക്കുന്ന ഉപകരണം പ്രത്യേക ലേസര്‍ ര്ശ്മികള്‍ അയച്ചാണ് ആളുകളുടെ ഹൃദയമിടിപ്പ് തിരിച്ചറിയുന്നത്. ഓരോ മനുഷ്യരിലും ഹൃദയമിടിപ്പിന്‍റെ താളം വ്യത്യാസപ്പെട്ടിരിക്കും. ഇതു തിരിച്ചറിഞ്ഞാണ് ആളുകളെ മനസ്സിലാക്കുക. ഒരു പ്രത്യേകസ്ഥലത്തെ കമ്പനങ്ങള്‍ വയറോ അതുപോലെയുള്ള മറ്റ് മാധ്യമങ്ങളോ ഇല്ലാതെ തന്നെ തിരിച്ചറിയാന്‍ കഴിയുന്ന സൂത്രമാണ് വൈബ്രോമെട്രി എന്നറിയപ്പെടുന്നത്. ഈ സൂത്രമാണ് ജെറ്റ്സണ്‍ പ്രയോഗിക്കുന്നതും. ക്യാമറകളെ പറ്റിക്കാനായി കുറ്റവാളികളും ഭീകരപ്രവര്‍ത്തകരും മുഖം മറച്ചും മറ്റും സഞ്ചരിക്കാറുണ്ട്. ഇത്തരക്കാരെ തിരിച്ചറിയാന്‍ ഇത് നന്നായി പ്രയോജനപ്പെടുമെന്നാണ് അമേരിക്കന്‍ സേനയുടെ വാദം.