Sivan
Jul 13,2020
4:04pm
ഹൃദയം കൊടുത്തുണ്ടാക്കിയ എഞ്ചിന്
1800-കളുടെ അവസാനകാലം. അക്കാലത്ത് ആവിയന്ത്രങ്ങളുപയോഗിച്ചാണ് വണ്ടികളോടിയിരുന്നതും വ്യവസാശാലകളിലെ യന്ത്രങ്ങള്‍ പ്രവര്‍ത്തിപ്പിച്ചിരുന്നതുമൊക്കെ. ആവിയന്ത്രത്തിന് പകരമായി മറ്റെന്തെങ്കിലും ഇന്ധനം ഉപയോഗിച്ച് പ്രവര്‍ത്തി്ക്കുന്ന ഒരു എഞ്ചിന് ഉണ്ടാക്കാനുള്ള പരിശ്രമത്തിലാണ് റുഡോള്‍ഫ് ഡീസല്‍ എന്ന ജര്‍മ്മന്‍ മെക്കാനിക്കല്‍ എഞ്ചിനീയര്‍. അതിന് അദ്ദേഹം ഉപയോഗിച്ചത് അമോണിയയാണ്. ഒരുവിധം ശരിയായി പ്രവര്‍ത്തിക്കാന്‍ തുടങ്ങിയ എഞ്ചിന് നോക്കി റുഡോള്‍ഫ് ഡീസല്‍ സന്തോഷത്തോടെ നിന്നു. പക്ഷേ, അതധികനേരം നീണ്ടുനിന്നില്ല. ആ എഞ്ചിന് അതിശക്തമായി പൊട്ടിത്തെറിച്ചു. ശരീരത്തില്‍ പൊള്ളലേറ്റ് റുഡോള്‍ഫ് ഡീസല്‍ നിലത്തുവീണുപോയി.
സാധാരണഗതിയില്‍ ആരും ഇനി ഇത്തരം അപകടം പിടിച്ച കളികള്‍ക്ക് പോകില്ല. പക്ഷേ, പരിക്ക് ഭേദമായതും റുഡോള്‍ഫ് ഡീസല്‍ വാശിയോടെ വീണ്ടും എഞ്ചിന് നിര്‍മ്മാണം തുടങ്ങി.
1858-ല്‍ പാരീസിലാണ് റുഡോള്‍ഫ് ഡീസല്‍ ജനിച്ചത്. മറ്റു കുട്ടികളെല്ലാം ജര്‍മ്മന്‍ വംശജനായ റുഡോള്‍ഫ് ഡീസലിനെ കളിയാക്കുമായിരുന്നു. പക്ഷേ, അതൊന്നും കൂസാതെ റുഡോള്‍ഫ് ഡീസല്‍ വാശിയോടെ പഠിച്ചു. മികച്ച മാര്‍ക്കോടെ വിജയിച്ചു. പിന്നീട് മ്യൂണിച്ചില്‍ മെക്കാനിക്കല്‍ എഞ്ചിനീയറിങ് പഠിക്കാന്‍ ചേര്‍ന്നു. മെക്കാനിക്കല്‍ എഞ്ചിനീയറിങില്‍ ബിരുദം നേടിയ ശേഷം റുഡോള്‍ഫ് സ്വിറ്റ്സര്‍ലന്‍ഡില്‍ ഒരു കമ്പനിയില്‍ ജോലിക്ക് ചേര്‍ന്നു.
1885-ല്‍ പാരീസില്‍ അദ്ദേഹം ഒരു പരീക്ഷണശാല സ്ഥാപിച്ചു. അവിടെവച്ചാണ് അദ്ദേഹം അമോണിയ കൊണ്ടു പ്രവര്‍ത്തിക്കുന്ന എഞ്ചിന് നിര്‍മ്മിച്ചത്. പൊട്ടിത്തെറിച്ച് റുഡോള്‍ഫിനെ മരണത്തിന്‍റെ വക്കുവരെ എത്തിച്ച ആ എഞ്ചിന്‍റെ പേരെന്തായിരുന്നുവെന്നോ, ബ്ലാക്ക് മിസ്ട്രസ്! പരീക്ഷണം നടത്തിയും മറ്റും കയ്യിലുള്ളതെല്ലാം തീര്‍ന്ന് റുഡോള്‍ഫ് ദരിദ്രനായി. പക്ഷേ, ചില പണക്കാരുടെ സഹായത്തോടെ അദ്ദേഹം തന്‍റെ എഞ്ചിന് പരീക്ഷണങ്ങള്‍ തുടര്‍ന്നു. പല തവണ പൊട്ടിത്തെറിച്ച് പൊള്ളലേറ്റുവെങ്കിലും റുഡോള്‍ഫ് അതൊന്നും വക വച്ചില്ല. ഒടുവില്‍ അദ്ദേഹം വിജയിച്ചു. നിലക്കടല എണ്ണ കൊണ്ട് പ്രവര്‍ത്തിക്കുന്ന ഒരു എഞ്ചിന് നിര്‍മ്മിച്ചു. ഇതില്‍ മാറ്റങ്ങള്‍ വരുത്തിയാണ് ഇന്നുകാണുന്ന ഡീസല്‍ എഞ്ചിന് രൂപപ്പെടുത്തിയത്.
പല പേറ്റന്റുകളും സ്വന്തം പേരിലുണ്ടെങ്കിലും സാമ്പത്തികമായി വലിയ നേട്ടമൊന്നുമുണ്ടാക്കാന്‍ റുഡോള്‍ഫിന് സാധിച്ചില്ല. 1913-ല്‍ ലണ്ടനില്‍ ഒരു കണ്‍വെന്‍ഷനില്‍ പങ്കെടുക്കാനായി പോയി. അവിടെ വച്ച് ബോട്ടില്‍ സ്ഞ്ചരിക്കവേ അദ്ദേഹം കടലില്‍ വീണ് അപ്രത്യക്ഷനായി. റുഡോള്‍ഫ് ആത്മഹത്യ ചെയ്തതാണെന്നും ചിലര്‍ പറയുന്നുണ്ട്. എഞ്ചിന് പൊട്ടിത്തെറിച്ച് പല തവണ മരണത്തിന്‍റെ വക്കില്‍നിന്ന് രക്ഷപ്പെട്ടെങ്കിലും സ്വയം മരണം തിരഞ്ഞെടുത്തതായിരിക്കുമോ ആ പ്രതിഭ.... ആര്‍ക്കറിയാം..
ഡീസല്‍ ഓട്ടോറിക്ഷകള്‍ കാണാറില്ലേ...കുടു കുടു എന്ന ശബ്ദം കേട്ടാല്‍ത്തന്നെ തിരിച്ചറിയാം അത് ഡീസല്‍ ഓട്ടോ ആണെന്ന്. ഓട്ടോയില്‍ മാത്രമല്ല, വലിയ താപവൈദ്യുതി നിലയങ്ങളിലും കപ്പലുകളിലും അന്തര്‍വാഹിനികളിലും ഫാക്ടറികളിലുമൊക്കെ ഡീസല്‍ എഞ്ചിന് ഉപയോഗിക്കാറുണ്ട്. കൂടുതല്‍ കരുത്ത് വേണ്ടയിടങ്ങളിലാണ് ഡീസല്‍ എഞ്ചിന് ഉപയോഗിക്കുക. വലിയ ട്രക്കുകളും മറ്റും ഓടുക ഡീസലിലാണ്. ഡീസല്‍ കൊണ്ടു പ്രവര്‍ത്തിക്കുന്ന ഒരു മോട്ടോര്‍ ആണ് ഡീസല്‍ എഞ്ചിന് എന്ന് ഒറ്റവാക്കില്‍ പറയാം. പെട്രോള്‍ എഞ്ചിനേക്കാള്‍ കരുത്തും ഇന്ധനക്ഷമതയും ഡീസല്‍ എഞ്ചിന് കൂടും.
