GK Uncle : Issue #9

ദക്ഷിണ കൊറിയയുടെ ആദ്യ സൈനിക വാർത്താവിനിമയ ഉപഗ്രഹം

ദക്ഷിണ കൊറിയയുടെ ആദ്യത്തെ മിലിറ്ററി കമ്യൂണിക്കേഷൻ സാറ്റലൈറ്റ് ഭ്രമണപഥത്തിലെത്തി. ANASIS - 2 എന്നാണ് ഇതിന്റെ പേര്.
ഇലോൺ മസ്കിന്റെ ഉടമസ്ഥതയിലുള്ള സ്പേസ് എക്സ് കമ്പനി നിർമിച്ച ഫാൽക്കൺ 9 റോക്കറ്റ് ഉപയോഗിച്ചാണ് ഈ ഉപഗ്രഹം വിക്ഷേപിച്ചത്. കുറച്ചുനാൾ മുമ്പ് രാജ്യാന്തര ബഹിരാകാശ നിലയത്തിലേക്ക് നാസയുടെ രണ്ട് ബഹിരാകാശയാത്രികരെ എത്തിച്ചതും ഇതേ റോക്കറ്റ് ആയിരുന്നു.

മാംഗനീസ് തിന്നുന്ന ബാക്ടീരിയ!

ലോഹങ്ങളും മറ്റും ദ്രവിപ്പിക്കുന്ന സൂക്ഷ്മജീവികളെക്കുറിച്ച് കേട്ടിട്ടുണ്ടാവുമല്ലോ. എന്നാൽ, ഈയിടെ കലിഫോർണിയ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ ഗവേഷകർ കണ്ടെത്തിയ ഒരിനം ബാക്ടീരിയ അൽപം വ്യത്യസ്തനാണ്. മാംഗനീസ് തിന്ന് ജീവിക്കുന്നവയാണ് ഇവ! അതായത് നമ്മൾ ഊർജം കിട്ടാൻ ഭക്ഷണം കഴിക്കുന്നതുപോലെയാണ് ഇക്കൂട്ടർ മാംഗനീസ് അകത്താക്കുന്നത്! ബാക്ടീരിയകൾക്കും ഫംഗസുകൾക്കുമൊക്കെ മാംഗനീസിനെ ഓക്സിഡൈസ് ചെയ്യാനാകും എന്ന് മുമ്പേ കണ്ടെത്തിയിട്ടുണ്ടെങ്കിലും ഇതാദ്യമായാണ് സ്വന്തം വളർച്ചയ്ക്കായി മാംഗനീസ് ശാപ്പിടുന്ന ബാക്ടീരിയയെ കണ്ടെത്തുന്നത്. വളരെ യാദൃച്ഛികമായി പൈപ്പുവെള്ളത്തിൽനിന്നാണ് ഈ ബാക്ടീരിയയെ കണ്ടെത്തിയത്.

മരങ്ങൾക്കു വേണ്ടി ആംബുലൻസ്!

ചിതൽ പോലെയള്ള കീടങ്ങളുടെ ആക്രമണം മൂലവും പ്രകൃതിക്ഷോഭങ്ങൾ മൂലവും ആരോഗ്യം നശിച്ച മരങ്ങളെ ചികിത്സിക്കാൻ 'ട്രീ ആംബുലൻസ്' പദ്ധതി അവതരിപ്പിച്ചിരിക്കുകയാണ് ചണ്ഡിഗഡ് സർക്കാർ. നാശത്തിന്റെ വക്കിലെത്തിയ മരങ്ങൾക്ക് പരിചരണം നൽകി അവയെ സംരക്ഷിക്കുകയാണ് ഇതിന്റെ ലക്ഷ്യം. 2019 -ൽ ചെന്നൈയിലാണ് ആദ്യമായി ഇങ്ങനെയൊരു ട്രീ ആംബുലൻസ് പദ്ധതി നടപ്പാക്കിയത്.

ഗേറ്റ ട്യുൻബെർഗിന് ഗുൽബെൻകിയൻ പുരസ്കാരം

സ്വീഡൻകാരിയായ ഗ്രേറ്റ ട്യുൻബെർഗ് എന്ന കൊച്ചുമിടുക്കി കുറച്ചുനാളുകൾക്ക് മുമ്പാണ് ലോകമെമ്പാടുമുള്ള പരിസ്ഥിതി സ്നേഹികളുടെ ആരാധനയും സ്നേഹവും പിടിച്ചുപറ്റിയത്. ഇപ്പോഴിതാ പ്രഥമ ഗുൽബെൻകിയൻ പ്രൈസ് ഫോർ ഹ്യുമാനിറ്റി ഗ്രേറ്റയെ തേടിയെത്തിയിരിക്കുന്നു. കാലാവസ്ഥാമാറ്റം തടയാനായി പരിസ്ഥിതി സംരക്ഷണ പ്രവർത്തനങ്ങൾക്ക് മുന്നിട്ടിറങ്ങാൻ ജനങ്ങളെ ഉദ്ബോധിപ്പിക്കാൻ ഗ്രേറ്റ നൽകിയ സേവനങ്ങളെ മാനിച്ചാണ് ഈ പുരസ്കാരം. എകദേശം പത്തുലക്ഷം യൂറോയാണ് സമ്മാനത്തുക. അത് മുഴുവൻ തന്റെ ഫൗണ്ടേഷനിലൂടെ വിവിധ പരിസ്ഥിതി സംഘടനകൾക്ക് നൽകാനാണ് ഗ്രേറ്റയുടെ തീരുമാനം.