StudyatChanakya Admin
Jun 19,2020
2:46pm
GK Uncle : Issue #7
രണ്ട് തലസ്ഥാനങ്ങൾ
ഇന്ത്യൻ സംസ്ഥാനങ്ങളുടെ പട്ടികയിൽ ഏറ്റവും തലയെടുപ്പോടെ നിന്നിരുന്ന ജമ്മു കശ്മീരിന് തലസ്ഥാനങ്ങളുടെ കാര്യത്തിൽ ഒരു റെക്കോർഡ് ഉണ്ടായിരുന്നു; രണ്ട് തലസ്ഥാനങ്ങളുള്ള ഒരേയൊരു സംസ്ഥാനം. 2019 -ൽ ജമ്മു കശ്മീരിന് സംസ്ഥാന പദവി നഷ്ടപ്പെട്ടതു മുതൽ ഒഴിഞ്ഞുകിടക്കുന്ന ആ റെക്കോർഡ് ഇപ്പോഴിതാ ഉത്തരാഖണ്ഡ് സ്വന്തമാക്കിക്കഴിഞ്ഞു. ഡറാഡൂൺ ആണ് ഉത്തരാഖണ്ഡിന്റെ തലസ്ഥാനം എന്നല്ലേ പഠിച്ചുവച്ചിരുന്നത്? ഇനി മുതൽ ഉത്തരാഖണ്ഡിന്റെ ശൈത്യകാല തലസ്ഥാനം എന്നാണ് ഡറാഡൂൺ അറിയപ്പെടുക. ചമോലി ജില്ലയിലെ ഗേർസേൻ (Gairsain) ആണ് ഉത്തരാഖണ്ഡിന്റെ വേനൽക്കാല തലസ്ഥാനം.
ആഴങ്ങളിലെ ആദ്യ വനിത
ഭൂമിയിലെ സമുദ്രങ്ങളിലെ ഏറ്റവും ആഴമുള്ള ഭാഗമാണ് പസിഫിക് സമുദ്രത്തിലെ മരിയാന ട്രെഞ്ചിലുള്ള (Mariana Trench) ചലഞ്ചർ ഡീപ് (Challenger Deep). സമുദ്രോപരിതലത്തിൽനിന്ന് ഏകദേശം 11 കിലോമീറ്റർ ആഴത്തിലാണ് ഈ പോയിന്റ്. ചലഞ്ചർ ഡീപ്പിലേക്ക് 'ഡൈവ്' ചെയ്ത ആദ്യ വനിത എന്ന റെക്കോർഡ് നാസയുടെ മുൻ ബഹിരാകാശസഞ്ചാരി കാത്തി സള്ളിവൻ (Kathy Sullivan) സ്വന്തമാക്കി. ബഹിരാകാശത്തു കൂടി നടന്ന ആദ്യ അമേരിക്കൻ വനിത എന്ന റെക്കോർഡും കാത്തിയുടെ പേരിലാണ്. ഈ രണ്ട് നേട്ടങ്ങളും സ്വന്തമാക്കിയ ഒരേയൊരാളാണ് കാത്തി. 1872-1876 കാലത്ത് പസിഫിക് സമുദ്രത്തിൽ പര്യവേക്ഷണം നടത്തിയ എച്ച്എംഎസ് ചലഞ്ചർ എന്ന ബ്രിട്ടിഷ് കപ്പലാണ് ഇങ്ങനെയൊരു ആഴമേറിയ ഭാഗത്തെക്കുറിച്ച് ആദ്യം രേഖപ്പെടുത്തിയത്.
ലോക ഭക്ഷ്യപുരസ്കാരം ഇന്ത്യക്കാരന്
ഇന്ത്യൻ-അമേരിക്കൻ ശാസ്ത്രജ്ഞൻ ഡോ. രത്തൻ ലാൽ 2020ലെ ലോക ഭക്ഷ്യ പുരസ്കാരത്തിന് അർഹനായി. പ്രശസ്ത മണ്ണ് ഗവേഷകനായ അദ്ദേഹം മണ്ണിന്റെ ആരോഗ്യം മെച്ചപ്പെടുത്തി കാർഷികോൽപാദനം വർധിപ്പിക്കാനുള്ള പഠനങ്ങളിലാണ് ശ്രദ്ധ കേന്ദ്രീകരിച്ചിരിക്കുന്നത്. അതിലൂടെ കാലാവസ്ഥാവ്യതിയാനത്തിന്റെ ആഘാതം കുറച്ച് പ്രകൃതിവിഭവങ്ങൾ സംരക്ഷിക്കാനുള്ള ശ്രമങ്ങളാണ് അദ്ദേഹത്തെ ഈ പുരസ്കാരത്തിന് അർഹനാക്കിയത്. കോടിക്കണക്കിന് സാധാരണക്കാരായ കർഷകർക്ക് ഡോ. രത്തൻ ലാലിന്റെ പഠനങ്ങൾ സഹായകമായിട്ടുണ്ട്. ഭക്ഷ്യവസ്തുക്കളുടെ ഗുണമേന്മയും ലഭ്യതയും വർധിപ്പിക്കാൻ സഹായിക്കുന്ന സംഭാവനകൾക്കു നൽകുന്ന ഈ പുരസ്കാരം 'കാർഷികമേഖലയിലെ നൊബേൽ സമ്മാനം' എന്നും അറിയപ്പെടുന്നു.
ഇന്ത്യൻ നേട്ടം
പ്രശസ്ത എഴുത്തുകാരനും ഹിന്ദിസിനിമാ ഗാനരചയിതാവുമായ ജാവേദ് അക്തറിന് 2020ലെ റിച്ചാർഡ് ഡോക്കിൻസ് പുരസ്കാരം ലഭിച്ചു. ഈ പുരസ്കാരം നേടുന്ന ആദ്യ ഇന്ത്യക്കാരനാണ് അദ്ദേഹം. ലോകപ്രശസ്ത ഇംഗ്ലിഷ് പരിണാമ ജീവശാസ്ത്രജ്ഞനായ റിച്ചാർഡ് ഡോക്കിൻസിന്റെ പേരിൽ ഏർപ്പെടുത്തിയ ഈ പുരസ്കാരം 2003 മുതൽ നൽകിവരുന്നു.
യുഎൻ രക്ഷാസമിതിയിലെ കുഞ്ഞൻ രാജ്യം
ഐക്യരാഷ്ട്ര സംഘടനയുടെ രക്ഷാസമിതിയിൽ (UN Security Council) താൽക്കാലിക അംഗത്വം നേടുന്ന ഏറ്റവും ചെറിയ രാജ്യം എന്ന റെക്കോർഡ് സെയിന്റ് വിൻസെന്റ് ആൻഡ് ദ് ഗ്രെനാഡൈൻസ് (St Vincent and the Grenadines) സ്വന്തമാക്കി. കുറച്ച് കുഞ്ഞൻ ദ്വീപുകൾ ചേർന്ന ഈ രാജ്യത്തിന്റെ ആകെ വിസ്തീർണം 389 ചതുരശ്ര കിലോമീറ്ററാണ്. അതായത് നമ്മുടെ ആലപ്പുഴ ജില്ലയുടെ മൂന്നിലൊന്ന് വലുപ്പം പോലും ഇല്ലാത്ത രാജ്യം!